»نشرت فى : الخميس، 15 أكتوبر 2015»بواسطة : »ليست هناك تعليقات

قصة بالدارجة المغربية عالية.




الجزء الأول

 لا ا مي مانقدرش نتزوج بيه انا مازال صغيرة و باغا ندير داري و طوموبيلتي و نسيفطك نتي و با للحج
مي : بنتي مستقبلك هو دارك و راجلك حنا ماباغين منك والو بغيت غير نتهنا عليك حتى الا مت نموت مرتاحة
غرغرو ليا عيني من بعد هاد الهدرة ماغانستحملش نبعد عليها دخل علينا با على غفلة مولاي العربي و من لا يعرفه لقاني كانتغبن و هو يخنزر فيا و قال : واش باغا تبقاي تاكلي ليا فالخبز هنا بلا فايدة لا زين لا قراية لا حداكة هاد السيد لي غايديك را بخيرو و خميرو و غاتعيشي فالنعيم
سمحو ليا زربت عليكم هادي الواليدة زهرة و با بغاو يزوجوني حيت بالنسبة ليهم البنت مصيرها دارها و الكوزينة اما القراية غير تخربيق .... عندي جوج خوتي كبار مزوجين بجوج خواتات و عايشين ف استراليا من نهار مشاو مابقاو جاو ولا عقلو علينا و عارفين با تقاعد ديالو على قد الحال انا هي الصغيرة سميتي عالية عندي 21 عام سمرة و قصيرة شوية و مطيبزة الفورمة هي هاديك الزين جا تال عندي و قلب الدورة و لا ماعرت انا حاكرة راسي شعري واقف كي الجيكس و لكن كحل و طويل عينيا كبار و مشفرين هادشي لي كايميزني
انا : مي انا غادا مع سيهام للقيسارية
الواليدة ( جايا هازة اليد ديال المهراز ) : و الله يا ديك الزركة و ماتكلسي يا تا نشخشخ ليك راسك
انا : بديت نتخبن و الخنونة و الحالة نطلب و نزاوك فمي ها العار ا مي البزيزيلة و الله مانتعطل
الواليدة : بقيتي فيا ا تريكة ديال الطلابة صافي سيري و ماتعطليش راك مابقيتيش ديال راسك
انا : ربي يخليك الحبيبة وا اري شي ربعمية دريال الى خصاتني شي حاجة ، بانت ليا الواليدة طلع ليها السكار بلي سمعات الفلوس و انا نعلق قبل ماتعطبني


 الجزء2

 الواليدة : اويلي على بنت الحرام 7 ديال العشية هادي و هي باقا دايعة فالزناقي الله يلقيها ليها فاقساني
با : فرقي عليك البنت ها هي قريب تمشي و تخليك غا بوحدك
الواليدة : ماتفكرنيش ا العربي ماساخياش بيها و لكن حياتها هي اللولة
انا : يالله ا صحبتي را تعطلنا صافي زيدي
سيهام : واخا واخا مالك زربانة دابا تحبي تا نتي و تحسي بيا
انا : بغيت ليك الحبوب نتي وياه دتبا يشبع فك بوسان و يلوحك كي الجرتيلة
براهيم ( عندو بوتيك ديال الحويج فالقيسارية و صاحب سيهام ) : مالنا على هاد الهدرة ا عالية را كانبغيها و غانتزوجها غا واقيلة نتي غاتسبقينا واقيلة را عاودات ليا سيهام على عريس الغفلة و بدا يفرنس
انا : صفاريت جريت سيهام برا و بديت نقرس فيها و نعض ياك كانقولك ماتبقايش ديري ليا الشوهة بقا ليا غا هاد القرد يتمركن عليا
سيهام : غوبشات و ماعجبهاش الحال جمعي فمك ا صاحبتي را ماشي براني غي راجل ختك بدات تفرنس تا هي جابت لي الضحكة
انا : صلفي غبري عليا ل داركم تا الليل و نتعايطو خليني نطلع مي راه دارتني ف مختفون واقيلة
طلعت لدار كانتسلت تلاقيت مع با ف الدروج غادي للجامع بست ليه يديه و طلعت مع الدخلة طارت عليا مي بنتفة شعري زين و زاد كمل دابا
انا : وا مي طلقيني را غاتقتليني
لا حياة لمن انادي بردات مي غدايدها و تلاحت ف السداري و سرحات رجليها
مي : فين كنتي ا عزري الدوار الفاقساني المشيراني
انا : حرام عليك ا مي واش انا ماندورش بحال البنات شوية نفوج على قلبي
مي : سدي دلقوشك ا زغبية و لا نود ليك انا ماعندي بنات لي يدورو و تقعدي جمعي حوايجك نمشيو للحمام راه غدا جايين الناس يشوفوك
انا قلبي تقبض عليا و حسيت بالحكرة ماباغاش نتزوج ا عيباد الله
انا : مي اري نهز عليك السطولة غاتكوني عيانة ، مي قولي ليا هاد الناس لي


 الجزء 3

غايزوجوني بولدهم شكوناهما و فين كايعرفوني و علاش بغاوني انا
مي : قرصاتني تا طرت انا سخفانة دابا تال الدار و نعاود ليك
دخلنا للدار عمرت اتاي و حطيت حليوات رقدت بيهم الواليدة باش تعاود ليا
مي : درك راسك العفريتة ، عاد المراة راها بنت عم باك ساكنة ف اكادير هي و راجلها عندها ولد واحد عايش ف الدانيمارك و بغات تزوجو و قالت ماكاين ماحسن ليه من دمها لي هي نتي و باك وافق حيت الدري شارب عقلو و و غايعيشك مزيان
انا : و لكن خاصني نشوفو و نتفاهم معاه
مي : غدا غايجيو و شوفيه ولا يشوفك
انا : مي فاش خدام و شحال عندو من عام
مي : باقي صغير عندو 39 عام فاش خدام ماعرت
انا : اويلي على باقي صغير هادا راه يولدني ا مي حرام عليكم لحتوني هاد اللوحة ة بديت نغبن
مي : نودي من حدايا ا وجه القهرة و الله تاتزوجيه راه عطينا الكلمة للناس
مشيت للبيت باش ننعس ماجانيش نعاس بقيت كانخمم عيطت لسيهام عاودت ليها بدات كاتبكي بحالا هي لي غاتزوج شحال هبيلة صافي قطعت و نعست
مي : وا فيقي المسخوطة راه 12 هادي و الناس جايين دابا
قلبت تيليفون لقيتها يالاه 10
انا : ا مالك ا زهرة زدتي ساعتين كاملة كاع
مي : شيرات عليا بالصندالة غاتنودي و لا مايعجبك حال راه خاصك تمشي ل الصالون و تقادي حالتك يالله يبان فك الضو شويا و نتي بحال المعزة
شكرا يا أماه ديما هازة ليا المعنويات انا غاسمعت الصالون و ندت نجري لبست جلابتي او خنشتي عطاتها ليا مي بلي صغارت عليها الثوب ديالها جايبو ليها با ف الدفوع ههه طركت سيهام و مشينا للصالون تفو شحال عامر بالبركاكات و بالصهد و بكلدوب و كلشي وصلاتني النوبة صاوبو ليا شعري و وجهي لي خاصو يتنتف نتفوه و لي خاصو يتصبغ صبغوه ماسالاو تا غفر ليا الله الدنوب
سيهام : ياه كاتشبهي ل صاحبتي عالية غا هي عورة و نتي

الجزء 4
لا نتفتها و درت زيفي و نضاضري و خرجنا ( نسيت ما قلت ليكم ختكم عورة هه ) وصلت للدار شافتني مي و عينيها غرغرو و عنقاتني
مي : تباركلاه على بنيتي عروسة
انا : صافي ا مي راه غانبدا نبكي
ضرت لقيت سيهام كاتهرنن بقيت نضحك عليها انا و مي و على هبالها و دخلنا للبيت شفت راسي فالمراية و تزعطت فيا هههه او سبحان مبدل الاحوال دارو ليا ماكياج خفيف بزااف و شعري بوكلي بنت زوينة لبست واحد الكندورة بيضة و فيها طريزات بالصم لصفر و شربيل صفر و طلقت شعري و جبتو بجنب حطيت انا و مي و سيهام لغدا سمعنا الدقان الناس جاو انا قلبي كايضرب على جهدو و فيا التبوريشة و الردان بحالا غايعدموني ههه
با : محبا ببنت عمي و فاميلتها تفضلو نهار كبير هادا
مي : مرحبا مرحبا زيدو تفضلو
كلسو الناس و جا با خرجني من الكوزينة بزز ماقدرتش نتحرك ههه كاتبان ليا مراة تكون ف الستينات و راجلها و بنت تكون قدي و ولد عندو شي 3 سنين سلمت عليهم و كلست
الحاجة نعيمة : تباركلاه و الصلاة على النبي انا ا بنتي هي عدوزتك و هادي مريم بنتي و هادا ولدها محمد امين بتاسمت و قلت ليهم مرحبا بيكم متشرفين
مريم : غزالة تباركلاه عليك خويا ماقدرش يجي معانا اليوم مشا هو و الوليد يقضيو شي شغل
با : ماكاين باس ا بنتي نتوما فيكم البركة
دازت العشية مزيانة الصراحة ناس ضريفين و متواضعين و باينة لباس عليهم غير من لبسهم انا و مريم تصاحبنا دغيا و تبادلنا ارقام التيليفون ضريفة بزاف و كاتدخل للخاطر
مشاو الناس جمعت الروينة انا و سيهام و شديتها تبات معايا جات عندي مي فالليل
مي : بنتي باك تافق مع الحاجة سيمانا الجاية العقد و الدفوع و من موراها بشهر العرس ان شاء الله
انا : زربانين ا مي باغين تهناو مني
مي : و شكون يسخا بكبدتو يا بنيتي هادي سنة الحياة

الجزء 5
خرجات مي بقيت مجمعة انا و سيهام حتى داني النعاس
السيمانة دازت طايرة فالتوجاد و الماسكات هادي تبيض هادي ترطب و الجرا على الوراق و داكشي
انا : اففف ا سيهام انا غدا غانتزوج براجل ماكانعرف عليه حتا سميتو و شارف عرفتي حاسة بروحي غاتزهق
سيهام : سكتي ا صاحبتي دابا توالفيه و تحبيه و تولي هادي كلها غا هدرا
انا : بغيت شي قصة حب بحال دبا الهنود
مي : لاواه الشينوة الى كرمات الحنة قشريها و دوزي تنعسي را تابعانا تامارة غدا
مشيت ننعس و انا دايرة يدي على نيفي كانشم ريحة الحنا
انا : شوفي عافاك ماتقويش ليا الماكياج بزاف و ديري ليا شي مشيطة غير خفيفة و سامبل
الكوافورة : كوني هانية غير رتاحي
من بعد ما ساليت شفت ف المراية عجبني راسي جات داتني بنت عمتي بالطوموبيل من الصالون طالعة فالدروج ستقبلوني بنات خوالي و عمامي بالزغاريت و الصلاة على النبي احساس زوين الصراحة دخلت لبست قفطان بيض كلو حجر غزال مع انا سمرة جا معايا هو هداك و سباط طالون بيض هادشي كلو سلفاتو ليا بنت خالتي اللع يخلف عليه بقيت جالست فالبيت و حشمانة شوية كانسمع الدقة المراكشية و الزغاريت عرفت الدفو جا
انا : اويلي قرصيني ا مي انا ف حلم و لا علم هادشي كلو على قبلي ا سعدي ا فرحي
مي : و مالك الهبيلة ماتستاهليش هادشي بصااح ا بنيتي و نتي راك غاتزوجي لينا
انا حشمت و حدرت راسي
الحاجة و مريم دخلو عندي للبيت : تباركلاه الله يحجبك ا بنتي مريم دارت ليا واحد الشال بيض فوق راسي و قالت ليا باش نخرج العدول جاو خرجوني من البيت بالصلاة و السلام و انا عينيا ف الارض و حشمانة هزيت راسي بان ليا واحد الراجل جالس مع با حدا العدول لابس كوستيم كحل و قاميجة بيضا و كرافاط كحلة سنانو بيضين و مستفين شعرو رطب و كحل و مخلط بالشيب داير ليه جيل و رادو اللور


الجزء 6

كايبان زوين و انيق قالت ليا مريم فودني هادا هو يحيى راجلك بتاسمت و حدرت راسي دار ليا با بلاصة حداه بدا العدول الاجراءات ديال الزواج عطاه يسني و تعطل بقا شاد الستيلو و مزير على يديه انا تزيرت و حبساتني البكية بدا العدول كايكحب بلعاني عاد سي يحيى فاق من القلبة و سنى سنيت ختى انا و بداو الزغاريت صافي ولا راجلي دابا كانشوف فيه بنص عين كايبان ليا ماحاملش هادشي كلو و كالس على اعصابو 
الحاجة نعيمة : نود ا ولدي نتا و مراتك هدرو شويا و تعرفو على بعضياتكم دخلنا ل بيتي جلست فوق ناموسيتي و هو جر كرسي جلس عليه و سد الباب و جبد كارو كايتكيف و كايخنزر فيا و باينة فيه كاعي على الوضعية
يحيى: شنو سميتك
انا : عالية قلتها و حادرة راسي
يحيى : ماعلموكش داركم بلي من قلة الادب تدوي مع شي واحد و عينيك ف جيهة خرا
تصدمت اويلي هادا مالو يالاه غادي نهدر و هو يقول
يحيى : شوفي باش نجيك من اللخر انا الواليدة لي بزاتك عليا و قالت ليا ها السخط ها الرضى ماعرفتش اش عجبها فيك برهوشة صغيرة غاتزوج بيا انا هادشي لي بقا و لا باينين لقيتو الواليدة نية و كليتو ليها دماغها أ العائلة الطماعة ماحسيتش براسي تا تلاحيت عليه بغيت نصرفقو كيفاش تجرأ يقول عليا هاد الهدرة ماقدرتش نستحمل هدرتو كي القرطاس
يحيى و هو شاد ليا ايدي : اش باغا ديري ا البرهوشة باغا ضربيني ؟ لصقني مع الحيط و بدا كايهدر من تحت سنانو هادشي لي طرا غايبقا بيناتنا اصلا تا واحد ماغايتيقك انا باش ندير الخاطر للواليدة غانتزوج بيك من بعد الزواج ب 6 شهر الله يعاونا و يعاونك غانطلقو 
خرج و سد الباب و سد عليا بيبان الامل لي كان عندي
تفرتكات الجقلة و الناس مشاو و انا بدلت دوشت و هربت من أسئلة مي و سيهام درت السبة بالنعاس مابغيت ندوي مع حتى واحد ف حتى حاجة انا حياتي


 الجزء 7 

حياتي وصلات نهايتها واخا باقا كاعمة بدات بقيت كانخمم و نبكي و ندعي ربي يدير تاويل ديال الخير اليامات كادوز و العرس كايقرب عدوزتي و مريم ماخلاو ماشراو ليا مساكن مهليين فيا ديما كانبغي نفركع الرمانة و نعاود اش وقع و لكن بلي كانشوف الفرحة ف عاينين مريم و خالتي و با و مي كانتراجع و كنصبر و نعطيها للبكا ماقدرت نعاود لحتى واحد اصلا هادشي مافيه مايتعاود 
مريم : لا ا صحبتي انا غاندوز موراك و يوصلنا يحيى ماكايت لا ازعاج لا والو
انا : واخا ا زين لي بان ليك يالله بلي توصلو عيطي ليا نهبط
الله يا ربي كي غاندير نتلاقا بداك الكمارة تاني تفو يا ربي امتى يدوز هاد العرس 
مي : عالية نزلي را البنت كاتسناك
نزلت وصلنا كحل العفطة لواحد المنتجع تجميلي كان لابس تيشورت بيض و تجين زرق و نضاضر الشمس رايبان كايبان بحال شي ممثل الطريق كاملة مادوينا من غير السلام وصلت انا و مريم تهلاو فينا مزيان قادو ليا شعري رطبوه و صاوبو ليا حجباني و ضفاري و لاسيغ للحمي كامل حشمت كنت بحالا خرجت من الحبس شكرت مريم بزاف على هاد النهار الزوين شدينا طاكسي و جات معايا للدار كانت باقا يومين للعرس دوزتها غا راحة كانحس براسي اميرة الغد ليه نقشت انا و مريم و صاحبتي سيهام و ماما و عدوزتي دوزنا ديك العشية ناشاط انا و العائلة الشطيح و الرديح نعسنا بكري مع العيا صبح صباح حليت عيني كانشوف الحنا حمرة فايدي شميتها و تبسمت فيقت البنات دوشت و فطرت و صليت لبست بقيت كالسة مع الدار تغدينا 
مريم : عالية هادا الوقت للصالون لبسي حوايجك و يالاه 
نضت لبست جلابة بيضا ديال الراندة و درت فولار بيض سلمت على مي و با رضاو عليا و خرجت لقينا يحيى كايتسنا لتحت باش يوصلنا شاف فيا من المراية القدامية 
يحيى : نتي ما عندك لي يوصلك نبقا انا ديما غادي جاي بيك

 الجزء 8

مريم قلباتها ضحك و انا ماجاوبتش دخلنا للصالون قادوني مزيان تصدمت فراسي او واش هادي هي عالية الخويبة لا محاال جيت واعرة بمعنى الكلمة
مريم حالة فمها : اويلي هادشي فين كان مخبي 
انا : صافي راه كانحشم ا صاحبتي هه
عنقاتني مسكينة و باستني جا راجلها دانا من الصالون هاد المرة سميتو احمد ضريف و هبيل بحالها وصلنا للقاعة لبست تكشيطة فالابيض و كلست فالعمارية جا العريس حيد ليا الفوال على وجهي و باس لبا راسي بز منو طبعا حتى هو جا زوين بزاف بيني و بينكم تزعطت فيه هزو بيا العمارية و بقاو يشطحو بيا نخضوني هههه داز عرس واعر واخا كلشي مزور و لكن احساس زوين تحسي براسك عروسة لبست لاغوب و توادعت مع عائلتي الدموع ولاو بحال الواد باس ليا با راسي و عينيه مغرغرين و جر يحيى و قال ليه : تهلى فيها ا ولدي راه غير هي لي عندي يحيى بقا كايشوف ف با و حدر راسو و تبسم ركبنا ف الطوموبيل و مشينا لدار يحيى او داري الجديدة
الطريق كاملة و انا مدورة وجهي للزاج و دموع هابطين كي الشتا حسبت بالشمتة و الغبينة و الحكرة وصلنا للدار حط ليا باليزتي فواحد البيت و زدح الباب و خرج من بعد ما تأكدت راه خرج نضت بدلت دوشت لبست بيجامتي و طحت دودة ماعقلتش امتى نعست 
حليت عيني فالصباح كايبان ليا يحيى مقابل معايا عودت غمضتهم ماحملتش كمارتو مع الصباح حل عليا الشرجم و حيد عليا الغطا 
يحيى : نوضي ا للالة سالا النعاس وجدي راسك من دابا شويا غاتجي لولليدة و مك يطلو عليك تصرفي بحالا ما واقع والو ماجاوبتوش و نضت كانقلب على نضاضري ماعقلتش فين حطيتهم شويا بان ليا لاحهم و كيعفط عليهم
يحيى : بلي نكون كانهدر عطيني وقت كاتفهمي
بديت نبكي و نشهق انا ماكانشوف والو بلا نضاضر و تعصبت جاني نهيار عصبي بقيت كانضرب فراسي و فيه و ف اي حاجة قدامي حتى طحت سخفت

 الجزء 9

فقت لقيتها 9 ديال الليل لقيت الواليدة حدايا و كاتمسح ليا على شعري قالت ليا بلي جاتني نوبة عصبية حيت ماخديتش دوايا ( فيا العصاب و عايشة غي ب دوا) و جابت ليا نضاضري سوكور لي فدار قاليها يحيى بلي هرست نضاضري الكداب لاخور
مشات مي و نضت نقلب مانجغدد النهار كامل ما واكلة والو كانحس بالدوخة قلبت التلاجة لقيتها كاتصفر طلع ليا الدم تكيت فبلاصتي و بقيت كانبكي جا يحيى دق الباب و دخل عندي
انا : اش بغيتي
يحيى : صغيرة و خويبة و عورة و مسطية مازال المهم راه عشاك ف الكوزينة لا تموتي ليا هنا
هدرتو ضراتنيو عصباتني شربت الدوا لا ندير فيه شي جريمة و نعست الغد فقت غسلت و مشيت للكوزينة وجدت الفطور حطيتو فوق الطبلة فطرت و خليت لبوركابي لا يحساب ليه جيعانة و مشيت نقاد الحويج فالبلاكار بان ليا فاق و مشا يفطر ماقال تا صباح الخير ياكل فيه السم خرج لخدمتو و نضت انا جمعت الدار و صاوبت لغدا و كلست كانتفرج النهار كامل و انا بوحدي السي يحيى ماداخل تال 11 د ليل ناشط و كايغني و انا كانتقلا بالسم بدل حوايجو و خرج كلس فالصالون و خدا ليا التيليكوموند و دار فيلم ديال الخليع ختكم خوافة نتضت كنجري سديت عليا البيت و نعست بقينا هاكاك ماكاندويوش مع بعضياتنا حتا من السلام هو الاخير ماكاينش و الى هدر كايعاير و صافي 
واحد النهار انا جالسة فالعشية تا دخل كي العجاجا شنق عليا و زدحني مع الحيط
انا : طلق مني ا الوحش بعد مني
هو : صافي هادشي لي علموك فداركم فيناهو الشيك لي كان فوق الطبلة دوي ؟ عطيتيه ل شي برهوش بحالك و لا خزنتيه لدواير الزمان ا الشفارة 
ماقدرتش نستحمل هدرتو دخل ل بيتي رونو كامل حيت يحسابني شفارة شوية عيط ليه صاحيو قاليه راك عطيتيني الشيك بان ليا تنادم معاه الحال دار عندي
انا : انا ماشي شف.. باقي ماكملتهاش شهقت
 
 الجزء 10

بالبكا و طحت حليت عيني لقيت راسي فالبيت و ماكاين تا واحد فالدار مي فينما نبغي نعاود ليها كاتقوليا المراة خاصها تصبر لراجلها و دارها كانكمدها ف قلبي و نسكت 
انا : عافاك اختي مريم خيرك مانساهش انا راه عندي لا ليصونس ف الاقتصاد غير شوفي الى لقيتي ليا 
مريم : انا غانهدر مع يحيى و نجوبك ماقدرتش نرفض خفت تشك فشي حاجة فالليل جا يحيى من الخدمة
يحيى : علاش طلبتي من ختي ضبر ليك ف خدمة مالك اش خاصك ؟ 
انا : خاصني كلشي الحياة ماشي هي الماكلة و النعاس كي البهايم انا مليت و مرضت بغيت نخرج من الدار شويا نبدل الحيوط
هو : تحل ليك الفم البرهوشة
انا : نتى لي برهوش شارف و داير الهبال لي شاف الكرافاطا و الماكانا يقول هنا نبات
هو : صرفقني تا طارو النضاضر و شدني من شعري داك الفم غانهرسو ليك الا ماسديتيهش ا المسخة الجيعانة شفت فيه و عيني كلهم دموع يالاه هز يديه بغا يضربني تاني و انا نغمض عيني و تكمشت ردخ يديه مع الحيط و قال ليا نساي الخدمة و خرج
يحيى مشا لواحد البار و كلس كايشرب و يكمي
يحيى : حياتي بين ليلة و نهار تخربقات علاش ا سيدي ربي علاش انا عمرني ماكنت بحال هاكا عمرني ضربت شي بنت عمرني جرحت شي واحد مايمكنش ، حيت غدراتني وحدة نولي بحال الوحش خاصني نتحكم فراسي
يا ربي ايمتا تكمل هاد 6 شهر و يسالي هادشي مابقيتش قادر نصبر انا مابغبت تا بنت ف حياتي مابغيت مسؤولية حد بغيت نبقا بوحدي بوحدي
عالية ماقدراتش تنعس بقات جالسة فالصالون كاتخمم
عالية : عييت بالمشاكيل عييت بالصداع و بلبكا خاصني ندير حل ل راسي هادي راه ماشي عيشة 
دخل يحيى غي شافتو و هي تقفز كاتنهج ولا كايبان ليها بحال شي وحش كاتخاف منو هو بلي شافها هاكاك ماحملش راسو جرها من ايديها بجهد 
يحيى : مالك قفزتي ؟ شفتي شي غول ؟


  الجزء 11

عالية ماقدراتش تجاوب خصوصا بلي شمات فيه ريحت الشراب عاود غوت عليها بالجهد
يحيى : ماتعصبينيش راه كاندوي معاك
عالية حيدات نضاضرها و بدات كاتمسح فعينيها لي غارقين دموع بطرف كمامها بحال شي بنية صغيرة 
عالية : عافاك طلقني راه ضريتيني فيدي 
طلقها و دخل ل بيتو و تا هي دخلت لبيتها و هي كاتقفقف بالخلعة جا يحيى كايدق عليها
يحيى : واش نقدر ندخل 
عالية شافت فيه ببراءة و حركات راسها ب اه
كلس حداها و شاف فيها و تبسم 
يحيى : عالية انا كانطلب السماح على كلشي انا عارف راسي عمرني كنت معاك مزيان و عارفك كاتكرهيني و لكنبغيتك تعرفي بلي راه ماشي لخاطري الحياة ا عالية قاصحة قاصحة بزاف خاصك توقع اي حاجة و تكون مستعد ل اي حاجة باش ماتصدمش و ما تمرضش من بعد ، المهم تقدري ماتفهمينيش نتي اصلا باقا صغيرة على هاد الهدرة انا من ليوم غانتفادا اي صداع بيناتنا و لبلاصة لي فيها نتي نخويها انا ا للالة نتمنى تسمحي ليا تصبحي على خير
مشى يحيى و خلاني غارقة ماعرفت نضحك ولا نبكي انا ماكرهتش نكونو مزيانين اه نتى ماشي لخاطرك و انا كانشوف ف عينيك واحد الحزن عميق و كبير و هدرتك فاهماها يمكن انا صغيرة فالعمر و لكن ماتخافش عندي عقل كايفهم مزيان اه كون تقدر تفهمني و تحس بيا ا يحيى
دازت شهرين على زواجنا و مابقيناش دابزنا فعلا مابقاش كايعمر الدار كيف قالي عطاني واحد الكارط كيشي باش ايلى خصاتني شي حاجة ماكرهتش نقوليه راك نتى لي خاصني ماشي لفلوس
باش نتفادى الملل عمرت وقتي بالنترنت كانتعلم اللغة الاسبانية حيت كاتعجبني و كانتعلم نطيب نهار كلو و انا نرون كناكل و نخلي ل يحيى عارفاه عزيز عليه طيابي واخا عمرو قالها ليا و عمرنا تجمعنا على طبلة وحدة
عالية : شكون 
مريم : عمي الغول حلي ا زين 
عالية : عاش من شافك الخايبة فين غبرتي عليا

  الجزء 12

توحشتك و توحشت خالتي 
مريم : حتى حنا ، اوا ا للالة راه جيت نقوليك نهار السبت عرس بنت خالتي زينب قوليها ل يحيى ها هي الدعوة باش تجيو
انا : الله يكمل عليها بالخير توحشت نيت شي عراسية نفوجو شويا 
مريم و اللهيلا لمهم نخليك دابا اكدي على يحيى يجي
انا : كوني هانيا كلسي قالاك بسلامة والله ماتمشي ها هو خوك دابا يدخل من الخدمة و شوفيه نيت
مريم : ا صاحبتي ماشي موشكيل مرا خرا
انا : كلسي ونسينا رام ماشي برانيا
بقات معايا مريم انا كانصاوب الكاسكروط و مجمعين و نتبادلو فالوصفات تادخل يحيى 
مشيت عندو قلت ليه على سلامتك و سلمت عليه ستغرب و انا نقوليه مريم هنا و فهم راسو سلم على ختو حطيت انا القهوة و الكيكة المسمن البغرير عمرت الطابلة نهار كامل و انا فالدار نحداك شويا ههه
مريم : اوا ا يحيى نتا لي صادقة ليك عندك شميشة فالدار
يحيى ضحك ضحكة مصطنعة : اه الله يعطيها الصحة
انا : بصحتكم
مشات مريم جمعت الطابلة و الماعن و جيت للصالون عند يحيى عطيتو الدعوة لي عطاتني مريم و قلت ليه بلي بنت خالتو عارضانا
يحيى : سيري نتي و مريم و الوليدة انا ماكانمشيش للعراس
انا : انا مانقدرش نمشي اول مرة عند الناس ماكانعرفهمش بلا راجلي و زايدون مريم اكدات عليك باش تمشي
يحيى : راجلك ؟ ضحك باستهزاء . واخا تانفكر
انا : اه راجلي و ضحكت ضحكت استهزاء و طلعت و هبطت فيه
مشيت كنجري لبيتي لايدير فيا شي كاريتة 
يحيى : شي نهار غانقتلك ولا نهرس لك داك الفم
بديت كانفرنس عرفت السيد تقرس
يحيى : وجدي راسك 9 غانمشيو
انا : فين ؟
يحيى : للعرس بنت خالتي
انا : المعروض فنهارو يبقى ف دارو انا ماغادا فين علمني قبل يالاه نوجد
يحيى : بدينا تاني فالتبرهيش ديالك بلا مانتعصب عليك 9 نصوني عليك هبطي ان غاندوز عند الواليدة و نلبس تما و نجي نديك

 الجزء 13
تغديت و جمعت الدار و مشيت للصالون صاوبت شعري بوكلي و جيت درت الماكياج فداري مابغيتش نجي مزوقة من الصالون صاوبت عينيا درت ليهم اي لاينر و ماسكارا هوما اصلا كبار و مشفرين و باينين بلا والو و درت واحد العكر بوردو جا ليا مع لون بشرتي كانبان بحال شي برازيلية شعري درت ليه مشيطة ديال الغجريات و لبست تكشيطة كحلة و من الفوق جيهت الصدر و الظهر كلها شبكة و التخت عريضة بحال الكسوة و صباط عالي كحل و صاك شانيل كحل هادشي كلو جاني فالدفوع ههه اما انا مانكساب والو درت اكسسوارات خفاف و صبغت ضفاري بالحمر كانبان بحال شي نجمة على البساط الاحمر مادرتش نظاظري غايخسرو ليا المنظر هزيت التيليفون كانلقا 5 مكالمات ديال يحيى ناري قفرتها لحت الفورير على كتافي و رشيت ريحتي المفضلة "سو اليكسير" و هبطت كانسمع غوات راجلي الضريف من الدروج ههه الدورة لي دار عندي صقل و الهدرة هربات ليه بحالا صرط لسانو
انا : سمح ليا ماسمعتش تيليفون راه يالا..
قاطعني يحيى : لا ماشي موشكيل ياللاه نمشيو ركبت حداه و تحركنا و انا كانحس ب الشوفات دياولو غاياكلوني حتى انا كانخطف شوفا مرة مرة كان لابس كوستيم كحل و قاميجة و كرافاطا كحلين و شعرو لي كايهبلني مرجعو للور و داير واحد البارفان جداب 
يحيى : يالله نزلي راه وصلنا 
انا : واخا 
نزلنا و شديت فيه بحال راجل و مراتو كانو يديه باردين عكسي انا لي يدي شاعلة فيهم العافية وركت لي على يديه بحال شي طفلة عاد كاتعلم تمشي و خايفة طيح كانبانو زوينين مواتين دخلنا للقاعة و العينين كاملين علينا و حنا داخلين مشادين لي شافنا يقول هادا هو الكوبل الميتالي جلسنا حدا عدوزتي و مريم و شي عناصر من عائلة يحيى 
تحدر ليا يحيى حدا ودني : عنداك يقولك راسك تنوضي تشطحي تشوهيني مع العائلة
انا ماجاوبتوش بتاسمت لمريم

 الجزء 14 

و حدرت راسي العرس زوين و لكن شنو الفائدة الى مانضتش نشطح
جاني الملل يحيى معرت فين ناض و انا نعتادر ل مريم و عدوزتي و خرجت للجردة و وقفت كانتأمل فالنجوم واحد شويا وقف قدامي واحد الباسل بغا يتعرف عليا قالك 
انا : سير بدل الساعة بالخرى راني مرت الراجل 
الباسل شد ليا ف ايدي مع الشدة مع قشعنا يحيى جا كايجري فحال شي تور هايج ضرب داك خينا طاح للارض و جرني انا جيهت الطموبيل يالاه بغيت نهدر و هو يصرفقني شعري تحل و غطا ليا وجهي بديت كانترعد بالعصاب و كانهدر و انا مخنوقة 
انا : مادرت والو هو لي جرني لعندو انا مادرت والو 
رفعني بقوة من الارض وشدني من عنقي 
يحيى : باغا تشوهيني ؟ هدري باغا العائلة تشوف فيا شوفا ناقصة كلكم بحال بحال كلكم غدارات و باغين الفلوس صافي و لكن انا من اليوم غانعيشك المرار 
فكيت راسي منو و بقي كانغوت 
انا : نتا مريييييض بعد مني انا غانقتلك و نقتل راسي و نتهنا اش دنبي ا سيدي رابي اش درت انا باش نستاهل هادشي بقيت كانبكي بهيستيرية و هو حدايا بقا كايشوف فيا تا ساليت و هزني خشاني فالطوموبيل و انا كانتركل و كانغوت علي يبعد مني بلوكا البيبان و ديمارا الطوموبيل وقف حدا البحر و بدا كايعاود
يحيى : اول مرة عرفت ابتسام كانت هادي 10 دابا . كانت مسؤولة حسابات عندنا فالشركة بغيتها للحلال ماشي للتفلية تعلقت بيها بزاف ولات هي كلشي عندي بغيتها ل درجة كبييرة تعماو لي العينين كانهدر بيها نفيق بيها و نعس بيها عمرني تخيلت راسي غانتصدم فيها 
حتال النهار لي غانحل مكتب المدير على غفلة و نلقاها كالسة ليه فحجرو و كايتباوسو تمنيت الارض تشق و تبلعني دارت راسها ماكاتعرفنيش انا كنت غير طريق باش دوز للرئيس ديالي حيت هو ملعق عليا تأزمت بزاف مورا داكشي لي طرا من تم و انا ف الدانمارك حتال النهار لي
 
 الجزء 15

الواليدة حلفات تاتزوجني و قالت ليا السخط ها الرضا و لكن انا ماقدرتش نساها واخا غدراتني و واخا نساها العيالات كلهم بحالها كلهم غدارات 
انا صوتي مقطع بالبكا : ديي ني للدار عا فاك
يحيى شد راسي بين يديه و باسني ف جبهتي زدت انا كانبكي كتر حط راسي على صدرو و بقى كايسكتني و يطلب ليا السماحة حسيت بالحنان و الامان و شفت الجانب الاخر ديالو لي كان مخبي عرفت انه حنين و طيب و لكن هادشي ماكايبررش تصرفاتو انا عييت بزاف مابقيتش قادرة نزيد نتحمل كتر مشينا للدار دخلنا حيدت حوايجي مسحت وجهي و وقفت حدا الشرجم كانطل و كانشوف الشتا هابطة خيط من السما و كانشم ريحت التراب مخلط بالشتا لي كادخل الفرحة على القلب تنهدت و بقيت ساهية
يحيى : واش عمرني قلت ليك شعرك زوين و طويل
انا : لا ماقلتيهاش و لكن قلتي حوايج خرين و ضحكت باستهزاء
يحيى : عالية سمحي ليا سمحي ليا بزاف 
انا : ماشي موشكيل مابقا قد مافات 3 شهر دغيا دوز و يسالي هاد الكابوس دورني عندو و حط ايديه على فمي و بقى كايشوف ليا ففمي هبط ايديه و هو يقرب لعندي حط ايديه على راسي من اللور و يد على ظهري و طبع بوسة طويلة ففمي 
شاف فيا بتاسم و قالي تصبحي على خير
عالية : واش انا كانحلم لا مايمكنش زعماا يكون كايبغيني ؟ لا هو كايبغي بتسام افففف غنتسطا حطيت ايدي على فمي كانتحسس بوستو و بديت كانضحك نعست نعسة حلوة فقت على صوتو كايهدر فالتيليفون... 
الجزء 16

انا : صباح الخير يحيى
يحيى : صباح النور عالية شوفي راه عندي واحد السفرية ديال الخدمة لاكادير و الواليدة قالت ليا نجيبك معايا باش تكلسي معاها شويا المهم جمعي حوايجك غانكلسو سيمانا
انا : واخا 
كون ماكانت مك كاعما ديني معاك الله يديك لجهنام اوجه النحس جمعت الدار و فطرت ليوما الحد يحيى ماخدامش و لكن ماكاينش فالدار ماتسوقتش ليه جمعت حوايجي و كلست ماكاين مايدار شويا غرني الشيطان و قلت علاش ماندخلش لبيت يحيى نبقشو شويا و يا ريتني مادرتها
دخلت بديت كانقلب مالقيت تا حاجة مهمة طاحت ليا حلقة من ودني هبطت نقلب عليها و انا نلقا واحد صنيديقة صغيرة جبدتها حليتها لقيت فيها تصاور يحيى و وحد خيتي اكيد هي بتيسام و واحد الخاتم مارياج ديال الدهب و ريحة ديال الدراري 
يحيى : اشداك تقيسي الحاجة لي ماشي ديالك
هزني من دراعي و شنق عليا 
يحيى كايهدر معصب : ياكما راك تيقتي راسك مراتي ديال بصح ماكانبغيش نتعدا عليك و لكن نتي ماشي ديال الضسارة نساي داكشي لي طرا البارح انا ماكنتش عارف اش كاندير بطا عليا امتا تكمل هاد 6 شهر و نتهنا من كمارتك
خرج و خلاني حتا كانقول كولشي تقاد و كايضرب كولشي ف زيرو تاني باقا شهرين و تكمل 6 شهر فينما كانتفكر هادشي قلبي كايتقطع انا كانبغيه اه كانبغيه و واخا عمرو عاملني مزيان و لكن انا عارفا قلبو مزيان غير الوقت و الحياة لي مامزياناش 
يحيى : يالاه المصيبة لي سلطها عليا الله غانشدو الطريق دابا
هزيت صاكي و ماجاوبتوش شدينا الطريق لاكادير غير ركبت فالطوموبيل نعست باش نتفادا الصداع مع يحيى
يحيى مع راسو : اففف لا انا مايمكنش نكون كانبغي هاد البرهوشة هي ماعندها عقل باغا غا تلعب و تفلا ،بلي شفت داك خينا شادها فالعرس حسيت بالسخونية طالعا معايا كيما كان الحال مابقا قد مافات و نتهنا

  الجزء 17

يحيى سايق و كايشوف ف عالية لي ناعسة بحال شي بنيتة صغيورة و الشعر مغطي ليها وجها وقف الطوموبيل و بقا كايتأمل فيها يالاه غايدير يديه يحيد الشعر على وجها و هي تفيق كاتحل عينيها بشوية جات عينيها ف عينيه توقف بيهم الزمن و هوما كايشوفو ف بعضياتهم حدرات عالية عينيها و يحيى عاق براسو و ديمارا الطوموبيل و زاد 
يحيى : وصلنا لدار الواليدة هبطي 
هبطنا طلعنا عدوزتي مسكينة ستقبلاتني بالثمر و الحليب حيت اول مرة نجي عندها تعاملنا طبعا كزوج و زوجة عاديين فالليل عطاتنا عدوزتي بيت مريم القديم ننعسو فيه 
اويلي كي غادنيرو هادشي ماضربتش ليه الحساب 
يحيى دخل و تلاح فوق الناموسية بكل أنانية و بقى كايلعب بالتيليفون 
انا مارضيتش هزيت كرسي دخلت البالكون و سديت عليا و بقيت جالسة و البرد كاينفخ فيا كبريائي مايسمحش ليا نخرج عندو ولا نشارك معاه الفراش
يحيى مع راسو : نشوفو ا للالة عالية واش قصوحية راسك غاتنفعك معايا 
انا ماقدرتش نعس بالبرد مابقيتش كانحس بيدي و رجلي وجهي زراك و حسيت بالحكرة و الغربة داتني عيني و غمضت شويا حسيت بشي يدين هازيني كان يحيى حطني فالناموسية و غطاني و باين فوجهو الخوف و انا كانقفقف بالبرد ماقدرتش ننعس ضربني البرد و بقيت كانكحب و نعطس يحيى كالس حدايا و كايتحسر حيت هو السباب و ماكلف راسو نا يطلب السماحة انا كانشوف فيه بحقد صبح الصباح و انا ماقدرتش نود بالدوخة و ضاربني البرد مزيان عيني ماقاداش نحلهم
خالتي : الله يا بنيتي مالك ياكما كاين باس
انا كانشوف ف يحيى و كانهدر : لا غير ماكنتش لابسة مزيان و البالكون كان محلول و ضربني البرد
يحيى : نوضي نمشيو للطبيب
انا : بلا ماتعذب راسك 
يحيى : نوضي بلا قصوحية الراس
مابغيتش نبقا نكتر معاه الهدرة حدا عدوزتي مشينا للطبيب الطريق كاملة و انا مخنزرة


 
 الجزء 18

دوزت شرا ليا الدواء و رجعني للدار 
بقيت انا و عدوزتي فالدار مسكينة قابلاتني بحال بنتها الله يكتر خيرها 
جا يحيى فالليل دخل عندي للبيت لقاني مكمشة و ناعسة غطاني و عاودت حيدت عليا الغطا 
انا : الى طلقتيها ماتوريهاش دار باها
يحيى : راسك قاصح
ماجاوبتوش و درت للجيه الاخرى و خليتو هز حوايجو ديال النعاس و خرج نعست تا انا فقت فالصباح حسيت براسي مزيانة جمعت الكوزينة و صاوبت الفطور فاقت عدوزتي و شيخي يحيى مابايتش فالدار حنا جالسين كانفطرو تادخل كحل العفطة
يحيى : صباح الخير 
الكل : صباح الخير 
انا : نكب ليك قهيوة ؟ 
هو : لا شكرا
خالتي : ولدي خرج نتا و مرتك شويا وريها المدينة و تساراو 
يخيى ماقدرش يرفض لمو : واخا الواليدة
انا فرحت حيت غانخرج
يحيى : عالية اجي عندي للبيت بلي تسالي
جمعت الطبلة و الماعن و مشيت عندو
يحيى: على السلامة بلي تفكرتي راه عيطت ليك 
ماجاوبتوش درت يدي على خصري و تكيت على الحيط و هزيت حاجب و كانشوف فيه زعما هدر خلاص طلقنا
يحيى : وجدي راسك واحد الساعة و نرجع نلقاك واجدة
انا : اوكي 
خرج يحيى و جات عندي عدوزتي للبيت تطمأن عليا شديتها بقات جالسة حدايا و مجمعين
خالتي : احياني ا بنيتي على الوقت كاتريب بنادم 
انا : علاش ا خالتي
خالتي : كانتفكر ولدي كي كان كيولى قلبي كايتقطع 
قبل 10 سنين ا بنيتي كانت الضحكة مكاتغيبش على وجهو و ناشط و كايبغي الحياة و جات خانزة ديال الخلى دمراتو و كرهاتو فراسو و فالدنيا جاه اكتئاب حاد و تصدم صدمة خيبة مشى لدانمارك حيت بغا يتفادى يتلاقا مع ديك خيتي واخا صدفة و بغا ينسى 
انا بلي حسيت بولدي غايضيع مني قررت نزوجو باش نتهنا عليه كان ديما كايرفض و بلي شفتك ا بنتي قررت انك نتي لي غاتكوني عروستي حيت كانعرف عائلتك و عارفاك مربية و بعقلك واخا صغيرة

  الجزء 19

قلت ليه ها سخط ها رضا و بطبيعة الحال دار ليا خاطري انا عارفاه ماباغيش هاد الزواج و يمكن حتى نتي و لكن لي بغيتك تأكدي منو ا بنتي بلي يحيى ولد مزيان هو بلي كايتعامل بعصبية و قسوة غير باش يبين للناس بلي هو قوي و لكن هو راه محطم من الداخل الى بغيتيه ابنتي راه تقدري ترديه حتى هو كايبغيك انا ماكانقولش هاد الهدرة باش ندافع على ولدي و لا باش نستاغلك باش ترديه للحياتو الطبيعية كانقولها حيت كانشوف الحب لي فعينيك ليه
انا تصدمت من كلام خالتي و بقيت غير كانشوف بقات فيا و بقى فيا يحيى و بقى فيا حتا راسي حيت حسيت براسي ضايعة و مخربقة 
بتاسمت لخالتي مسحات ليا على شعري و خرجات 
لبست سروال تجين كحل كونفيغس بيضا قميجة بيضة و تجاكيط كحلة ديال الجلد درت لشعري ضفيرة ديال السبولة و اكتفيت بماسكارا و كحل و كلوس فلون فمي جا يحيى 
يحيى : الواليدة فين عالية ؟ 
خالتي : راه فالبيت ا ولدي سير عندها
وقف حدا باب البيت و وقف مدهول كايشوف ف عالية كادور فالبيت كاتقلب على شي حاجة بحال المسطية ضحك عليها كانت اول مرة تشوفو كايضحك ضحكتو زوينة و هو زوين و كلشي فيه زوين
انا : اش كاين مالنا ؟ اففف واش مابانش لك صاكي 
يحيى : دايرة النضاضر و ماكاتشوفي تا وزة راه موراك 
ضحكت على راسي هزيت صاكي و خرجت سبقتو 
يحيى : كايعجبك لبحر ؟ 
انا : اه كانموت عليه
يخيى : سعداتو 
حشمت و هبطت راسي بقا كايشوف فيا و يضحك
مشينا لواحد ريسطو حدا البحر 
يحيى : تعصبت اش داني ندوموندي الحوت كي كايديرو ينقيو هاد العجب
انا : هههه واش نتا ديما هاكا معصب معصب حتا على راسك
يحيى : خشي فوجهك و سكتي
جريت ليه طبسيلو و نقيت ليه الحوت و رiديتو ليه
يحيى : شكرا علاش عدبتي راسك راه كانعرف نقيه
انا : ههه باينة ماشي موشكيل ا سيدي بالصحة

  الجزء 20

كملنا الغدا و خرجنا كانتمشاو حدا البحر 
يحيى : شفتي هاداك الكلب لي لهيه كايتعتابر من اخطر انواع الكلاب كان عندي بحالو 
غير سمعت الكلب تخبيت ورا يحيى و شديت ليه فيديه كانترعد
انا : فيناهوا فين يالاه نحيدو من هنا عافاك
يحيى كايضحك على المنظر ديالي تا دمعو ليه عينيه عمرو ماضحك بحال هاكا من نهار عرفتو 
يحيى : مادام انا معاك ماعندك مناش تخافي
فرحاتني هدرتو و حسيت بالأمان 
انا : يالاه نمشيو 
فالطوموبيل
يحيى : غدا غانرجعو للدار فالصباح ساليت خدمتي هنا
انا : افف ماسخيتش بخالتي 
يحيى : حتى هي ماسخاتش بيك نتي عزيزة عليها بزاف 
انا بابتسامة : اه عرفت و حتى هي و الله
وصلني يحيى للدار و مشى يقضي شي غراض و طلعت انا جمعت مع خالتي شويا و طلعت نجمع حويجي
الغد لي غالصباح
انا : تهلاي فراسك ا خالتي و سلمي على عمي بزاف بلي يجي 
خالتي : حتى نتي ا بنيتي تهلاي فراسك و فراجلك و ماتغبروش عليا
يحيى : وا صافي بحالا غاديين للغابون
شدينا الطريق شعل يحيى الراديو كانت باديا اغنية ديال عمر دياب
" انا عايش و مش عايش و مش قادر على بعدك ، و لا عارف فيوم انسى و لا عايز حبيب بعدك " 
طفاها و عاودت شعلتها و عاود طفاها 
يحيى : واش يديك كاياكلوك انا كانكره هاد الاغنية
انا : و انا مالي انا كاتعجبني 
يحيى : كايهدر من تحت سنانو و عينيه مغرغرين كانت كاتغنيها ليا ابتسام و فنما كنسمعها كانتفكرها 
انا : سمح ليا ماقصدتش
وصلنا للدار ستفت الحويج و صبنت لي خاصو يتصبن و وجدت غدا خفيف مع العيا تغديت و مشيت نتكا يحيى ماكاينش كي ديما 
فقت لقيتها 5 ديال العشية و يحيى باقي ماجا جمعت حوايجي و مشيت للحمام نكمد عظامي نحيد العيا ديال السفر 
يحيى دخل للدار و مالقا تاواحد كايقول مع راسو 
يحيى : فين مشات هادي ؟ ياكما طرات ليها شي حاجة

  الجزء 21

الى وقعات ليها شي حاجة ماغانسمحش لراسي حوايجها هنا و لكن هي فينها ماموالفاش كاتخرج و تعطل بحال هاكا
عالية من 5 و هي خارجة دازت للصالون مارجعات تال 9:30 ديال الليل مع الدخلة للدار جرها يحيى
يحيى : فين كنتي اش هاد التعطيلة واش ماحشمتيش عقلي كان ايخرج و تخلعت عليك كون طرات ليك شي حاجة كون مت
عالية بصدمة : كيفاش ؟ تخلعتي عليا ؟ تموت ؟ اش هاد الهدرة ؟ من ايمتى كانهمك انا اصلا ضحكت باستهزاء و درت عندو انا كنت فالحمام و ماكاين لاش تخاف نموت كاع عارفة زايد ناقص عندك 
زدت و خليتو
يحيى : كانبغيك
جمدت فبلاصتي بلي سمعت هاد الهدرة 
يحيى : انا كانبغيك ا عالية
انا : لا نتا ماكاتبغينيش نتا كاتبغي غير راسك لي كايبغي شي واحد ماكيجرحوش لي كايبغي شي واحد ماكيتكرفسش عليه لي كايبغي شي واحد ماكايضروش و نتى هادشي كامل درتيه و رديتي ليا حياتي جحيم
خرجت كاع داكشي لي فقلبي من جيهتو كاع داك الحزن و الظلم لي كنت كانحس بيه قلتو ليه
خرج و خبط الباب بالزربة 
دازت يومين و باقي ماجاش للدار ياكما واقعة ليه شي حاجة لا اسيدي ربي حفظو ليا كيفما كان الحال انا كانبغيه
النهار الرابع دخل حادر راسو و باينة فيه عيان و ماناعسش مدة
متبقاش كيدوي معايا ولا يعايرني ولا والو بحالا ماكايناش واخا كانخلي ليه الماكلة ماكاياكلهاش 
بقى فيا الحال من جيهتو داز وقت و حنا على ديك الحالة ليوم 5 شهر و 25 يوم دازت على زواجنا يعني باقي 5 ايام 
كانحس بالكتئاب و العيا بحال شي واحد عاد راجع من الحرب مابقيت باغا والو باغا غا النفسية ديالي ترتاح 
بديت كانجمع ف حوايجي ما بقا والو و نرجع بمرة لدارنا يحيى كايشوف و ساكت 
باقي نهار غدا غانمشي بحالي 
دخلت عند يحيى للبيت باش ندوي معاه
انا : ها هي 6 شهر سالات كيفما كنتي باغي

  الجزء 22

و هاد المسرحية تا هي 
من ليوم غاتولي ديال راسك و غاتهنا من هاد البرهوشة او المصيبة لي لاصقة فيك
عمرني ماكنت كانتخايل راسي غانتزوج بهاد الطريقة و غانطلق بهاد الطريقة يمكن هادشي لي مكتب ليا الله
كانتمنى ليك السعادة و كانتمنى تلقى المراة لي تنسيك فكلشي
انا كانبغيك ا يحيى و يمكن حتى نتا و لكن هادشي ماكافيش نتى نفسك عزيزة عليك و انا كرامتي ماتسمحش ليا نصبر ل الإهانة تضربت و تعايرت و تظلمت و تحكرت صافي مانقدرش نصبر مازال كان كايحساب ليا الزواج غايعوضني على شحال من حاجة كيفما قالت ليا مي و لكن بعد المرات كانغلطو فالحكم ديالنا على العلاقة الزوجية حطيت ليه خاتمو و خرجت 
دخلت للبيت سديت عليا و كلست ماهبطات ليا تا دمعة صافي نشفو و عينيا طابو خليت ليه حوايجو لي شرا ليا و الدهب و كلشي 
سمعت التهراس فالبيت لي فيه يحيى مشيت كانجري لقيتو شخشخ كلشي و كالس فالأرض و يديه عامرة دمايات 
جبت العلبة ديال الاسعافات الاولية مسحت ليه الجرح بلا مانهدر معاه داويتها ليه و لويت عليها الفاصمة هزيت راسي لقيتو كايبكي بهيستيرية بحال شي ولد صغير هربات عليه مو 
مسحت ليه دموعو بغيت نوض و شدليا ايدي
يحيى : انا كانبغيك ا عالية تيقيني بصح انا جرحتك و درت شحال من حاجة خايبة و لكن عرفت بلي مانقدرش نعيش بلا بيك تا دقيقة نتي كلشي عندي نتي تستاهلي يبغيك الواحد انا ماغاديش نسمح فيك حيت كنبغيك اه كنبغيك نساي الطلاق نتي ماعندك فين تمشي بلاصتك هي قلبي هنا و كيشير لصدرو غاتبقاي فدارك حدا راجلك هاد 6 شهر عتابريها سطاج ديال الزواج حيت غانتزوجو ديال بصح
تخلطو ليا الدموع مع الضحكة عنقتو حطيت راسي على صدرو و بقيت كانبكي و حتى هو كايبكي درنا جنازة ههه
قررنا ننساو كلشي و نبداو من جديد 
جمعنا بزوج الروينة ليدار و مشيت للكوزينة

  الجزء 23

انا كانوجد الفطور و حبيبي مقابل معايا كايشوف فيا و مبتاسم الله شحال زوين 
يحيى : شعرك زوين طويل بحال لسانك
انا كانضحك : هه ميغسي 
يحيى : مابيناتناش ا حبيبة
انا : حشمت و حدرت راسي 
ناض عندي شد وجهي بين يديه و باس ليا راسي
تغدينا فجو زوين اول مرة نتغداو مجموعين ههه
يحيى : الزين ديالي انا غادي خدام دابا نتلاقاو فالعشية و غمزني
انا : واخا الله يسهل عليك 
نضت معاه تال الباب باس ليا راسي و مشى
اوا هادا هو الوقت فين نوجد لشي ليلة رومانسية من داكشي
جمعت شعري ديل الحصان و درت ماسكارا بينات ليا جمال عينيا وحيدت النضاضر تاني خصرو ليا المنظر ههه درت عكر حمر ناشف و لبست واحد لاغوب قصيرة كحلة و من لفوق شبكة و الظهر كلو عريان و سباط كحل عالي 
زوقت الناموسية كلها ورد احمر و وجدت عشى خفيف رومانسي و شعلت شموع عطرية بريحة الفاني سمعت الصونيط فالباب اكيد حبيبي هدا 
حليت 
يحيى : سمحي ليا ا ختي واقلة غالط فالعنوان
بديت كانضحك و جريتو دخلتو و سديت الباب مدة و حنا كانشوفو ف بعضياتنا كسرت الصمت 
انا : واش بغيتي تعشى ؟
يحيى : بيك اه 
انا : ضحكت و شديت ليه ايديه و ديتو لبيت النعاس عجبو المنظر بزاف عنقني و طبع بوسة على يدي اوا و كملو من راسكم ههه 
كانت اسعد ليلة ليا مع راجلي اه دابا ولا راجلي ديال بصح

   الجزء 24 

كان كايحساب ليا غانبقاو ديما هاكا و لكن كنت غالطة
فقت الصباح مالقيتش يحيى حدايا نضت دوشت و لبست و خرجت نوجد الفطور يحيى ماكاينش فالدار او هادا فين مشى 
جمعت الدار بانت ليا واحد الورقة فوق الطبلة كانت استدعاء من المحكمة على ود الطلاق 
لا مايمكنش لا يحيى كايبغيني تحشو عليا الركابي و ديك الهدرة كاملة و داك شي لي عشناه البارح مايمكنش هادشي كلو يكون كدوب ماقدرتش نستحمل هزيت حوايجي و مشيت لدارنا سولوني الدار قلت ليهم غانطلق مي ماقدراتش تناقش معايا بلي شافت حالتي خافت يجيني انهيار عصبي تاني 
مشيت للمحكمة فالنهار الموعود و انا كانقول فراسي اكيد كايتفلى يحيى كايبغيني هادي غير شي مفاجئة
و لكن داكشي كان بصح قويت راسي و دخلت للمحكمة الجلسة كاملة ماشفتش فيه و لي ضارني هو انه ضحك عليا على الاقل نعرف غير السبب
دازو الجلسات و طلقنا اه انا دابا مطلقة و انا بنت 22 عام اش غايقولو عليا الناس دارنا ماحيلتهم ليا لي مرضت و غي كانخمم الماكلة قطعتها ماحيلتهم لهدرا ديال المجتمع لي ماكايرحمش دازت 4 شهر على طلاقي دابا
مي : بنيتي واش ما رديتي البال لوالو
انا : لا ا مي شنو
مي : من نهار جيتي ما جاتك حق الشهر سيري دوزي ا بنيتي راك حاملة واقيلا
انا مصدومة و كنبكي : و لكن ا مي انا ماباغاش نحمل انا ماخصنيش نحمل
مي : قضاء الله هدا ا بنتي لي بغاها ربي مرحبا بيها و تا الى كنتي حاملة راك ماجبتيهش من الزنقة ا بنتي
مشيت لفرماسيان جبت تحليل البول الغد ليه فالصباح درتو و توقعات مي كانت فمحلها 
بكيت و خبطت ففخادي حتى شبعت
با : حلي ا بنتي هاد الباب حلي واش بغيتي تقتلينا بالخلعة عليك
مي : حنا سبابك يا بنيتي غير حلي

  الجزء 25

حليت و تلاحيت على با و بكيت حتا بردت هزيت راسي فالمراية شفت فوجهي مزيان مابقيتش كانشبه لراسي 
ضعافيت و تبدلت 
علاش حتا ندير فراسي هاد الحالة ينعل بو الدنيا 
من داك النهار حلفت مانبقا نزل دمعة ولدي انا قادة نربيه 
خرجت كانقلب على خدمة والو و تقول شويا دخلت لواحد الشركة و تلاقيت مع سيهام صاحبتي تعانقنا حتى بكينا عاودت ليها كلشي بقيت فيها و قالت لي بلي هي خدامة هنا و تقدر تشوف ليا مع الحاج المدير ديال الشركة يشوف ليا شي بوسط
انا : الى درتي فيا هاد الخير عمرني نساه لك
سيهام : نتي ختي الحمارة خلي ليا السيفي ديالك و كوني هانيا
من بعد ربعيام عيطات لي سيهام و قالت ليا نجي ندوز اونطخوتيان باش نبدا دوزتو و تقبلت فرحت بزاف
بديت الخدمة فقسم المحاسبة كنت خدامة فجو زوين و حتى الخلصة كانت كافياني و مقنعاني 
درت 7 شهر كرشي ولات سابقاني هه غلاضيت خرجت من الخدمة مع 6:00 و مشيت دزت للقيسارية خديت شي حوايج للبيبي قالت ليا الطبيبة عندي بنيتة داكشي كايحمق شريت شي لبيسات و رجعت للدار دخلت و تفاجأت لقيت خالتي و مريم كاينين مع ماما
انا : السلام عليكم عنقاتني خالتي و بدات كاتبكي مسكينة و مريم حتى هي
خالتي : سمحي ليا ا بنتي سمحي ليا ماعندي وجه باش نجي عندك
انا : ماتقوليش هاد الهدرة ا خالتي معزتك باقا ف بلاصتها لا نتي لا مريم
مريم : ماتقلقيش حيت عمرنا جينا نشوفوك ماما كانت عندها عملية ف فرنسا و يالاه رجعات هادي شهرين بلي برات شويا جينا عندك
انا : سمحي ليا ا خالتي ماكانتش ف خباري مايكون عندك باس
خالتي : لهلا يوريك باس ا بنيتي كيدايرة نتي مع التقل و اشنو عندك ؟
انا : واقيلا بنيتة هادشي لي قالت لي الطبيبة
مريم : هه هي نزوجها لولدي
انا : و فين نلقى شي نساب بحالكم مرحبا نتي راك ختي ا مريم

  الجزء 26

خالتي : احياني ا بنيتي راني مكوية من جيهتك من نهار مشيتي و انا مريضة 
انا : خالتي انا مامشيتش و لحد الان انا ماعارفاش لاش طلقت
قلبات ماما الموضوع و بقينا داويين 
مريم فودني : نودي بغيت ندوي معاك 
مشينا لبيتي 
مريم : عالية انا عارفة سباب الطلاق ، يحيى مريض هو دابا ف الدانمارك مشى يدير عملية تماك على القلب نسبة النجاح كانت عندو ضعيفة و خاف لا يقولها لك و تخلاي عليه هو كان عارف راسو مريض بلي مشيتو عند الوليدة لاكادير ماكانتش عندو خدمة غير كدب عليك كيف كدب علينا كاملين كان متبع مع الطبيب ديالو و كايدير شي تحاليل
العملية دازت و هو دابا بيخير مابغاش يرجع للمغريب حيت ماعندوش الوجه هادشي فخباري انا وياك فقط الى عرفات الوليدة راه مريض تقدر تمشي فيها و نتي عارفاها ماعندها صحة
انا بصدمة : و لكن و لكن انا ماكنتش غانتخلى عليه كيفاش فكر هاكا انا كانبغيه هادا ماشي مبرر باش يخليني 
مريم : انا فاهماك ا عالية هادشي قلتو ليك غير باش مايبقاش ضارك راسك و ماتقوليها ل حتى واحد هو ديما كايسولني عليك و ماناسيكش غايتسطى عليك 
انا : هو عارف بلي انا حاملة ؟ 
مريم : لا تبغي نقولها ليه ؟ 
انا : لا عافاك و وصي حتى ماماك مابغيتوش يعرف عافاك
مريم : اوكي ختي لي بان ليك
مشات خالتي و مريم و خلاوني كانخمم كيفاش عطاتو خاطرو انا كانبغيه مستحيل نخليه كيفاش قدر يفكر هاكا
بعد مدة
انا : مي راه باقي الحال على الولادة باقي 10 يام
مي : واش الولادة غاتعلمك كلسي ا بنت الحرام والله كون ماجيتيني واحلة فروحك تانشتف عليك على قصوحية راسك
ضحكت على مي مسكينة خايفة عليا
انا : كوني هانية ا زهرة ماعندك مناش تخافي
مشيت للخدمة سيهام ماكاتحيدش من حدايا خايفاني نولد هه كلشي خايف عليا حسيت بشي وجع خفيف ماديتهاش فيه


  الجزء 27

خرجنا مع 6:00 
انا : لا مايمكنش مايمكنش يكون هو ماخاصوش يشوفني
شافني يحيى و جا كايجري انا ماقدرتش نجري مع التقل
يحيى شد لي ايدي : عالية كيدايرة ماتصوريش شحال توحشتك علاش ماقلتيش ليا حاملة علاش انا رجعت و عمرني ماغانخليك مازال
انا : طلق مني ، سمح ليا انا ماكانعرفكش 
نطرت ايدي و دورت وجهي غانمشي و جرني عندو بالجهد
يحيى : نتي ماعندك فين تمشي بلاصتك هي دارك الى ماشي على قبلي غير على قبل داكشي لي فكرشك
انا : سير فحالك هادي بنتي انا بوحدي غانولدها بوحدي و نربيها بوحدي نتا ماعندك تا بلاصة بيناتنا
شدني من دراعي بجهد و كايهدر من تحت سنانو : عالية ماتخلينيش نفقد اعصابي 
انا : ماشي شغلي عطيني التيساع ا سيدي اش بيني و بينك
يحيى حط يديه على كرشي : هادشي لي فكرشك و بيناتنا حب كبير ماتقدريش تنكريه
غرغرو ليا عينيا مشيت و خايتو واقف وصلت للدار و عاودت لمي اش وقع
مي : بنيتي كون ماكانش باغيك مايجيش عندك رجعي لراجلك و ماتخليش هاد البنية تكبر بلا باها
انا : باها غاتشوفو امي انا مافارقاش بيناتهم و لكن مانقدرش نرجع ليه
مي : ديري عقلك ا بنيتي تا باك راه ماكرهكش ترجعي لدارك فكري ا بنيتي الله يرضي عليك
الغد ليه جات خالتي و مريم و شيخي و يحيى هدرو مع با و مي و تغدينا مجموعين
خالتي : بنيتي انا ماغانبزز عليك والو وراك عارفة معزتك عندي ، انا بغيت نشوفكم مجموعين و تكبرو بنيتكم بيناتكم نعلي الشيطان ا بنتي و ماعرفتي الخير فين كاين
شيخي : الله يهديكم ا بنيتي على بعضياتكم 
انا : يكون خير ان شاء الله 
فرحو مساكن بهدرتي خالتي باست ليا راسي و بدات كاتبكي مسكينة حشماتني
با : سيري ا بنتي نتي و راجلك للبيت هدرو شويا 
مشيت و تبعني كحل العفطة كلست و كلس حدايا 
انا : نوض بعد مني را تيساع عطاه الل

  الجزء 28

يحيى : انا موحش مراتي و باغي نكلس حداها شي موشكيل 
انا : هه شفتك تيقتي راسك مراتك غير فالوراق نتا مابقيتي كاتعني ليا والو شوف لي نطولوه نقصروه انا رجعت على قبل بنتي
يحيى : بنتنا ، ماكايهمش المهم غايجمعنا سقف واحد و الا انا ماكانعنيش ليك نتي راك كاتعني ليا
انا : اففففففف كاتعصبني صافي سير فحالك دابا
من بعد 5 ايام درنا العقد و رجعت لداري ماتبدل فيها والو كلشي باقي كيف خليتو 
يحيى حط ايديه على كرشي و قال : مرحبا بيكم فداركم
قرصتو فايديه تا طار
انا : ماتمسنيش الله يرحم باك
يحيى : عالية سمحي ليا بلي عرفت راسي مريض و نسبة نجاح العملية ضعيفة خفتك تخلاي عليا بلي تعرفي حيت نتي باقا صغيرة و باغا تعيشي ، و حتى الا ماتخليتيش عليا نتي تنهد و قال خفت نموت انا و نخليك داكشي علاش بان ليا الطلاق هو احسن حل
خنزرت فيه 
انا : مابغيتش نتناقش فالموضوع و هادشي ماشي مبرر نتا تخليتي عليا و صافي المهم انا غادا نعس حيت عيانة بلا ماتفيقني 
يحيى : ماغاتاكلي والو ؟
ماجاوبتوش و مشيت
ضرباتني الفيقة مع 7 ديال العشية 
لقيتو حاط الماكلة فوق الطبلة و كاياكل مشيت جلست فالارض مخنزرة و شعري واقف جريت حدايا الطبلة و بديت كاناكل بحالا خارجة من الحبس هادي تنفع هادي تضر حتى عمرتها مزياان و دفعت الطابلة و سرحت رجليا مبقيتش قادرة نتحرك مازال
يحيى كايشوف فيا و كايضحك شحال كايبان زوين و هو كايضحك
انا : ضحك الضحك راه فيك
يحيى : شحال كاتحمقي و نتي كاتاكلي هاكا
انا : شحال كاتعصبني و نتا كاتهدر هاكا 
جر ايدي باسها و ناض كايجمع الطبلة 
مشيت لصالون شعلت التلفازة و جلست نتفرج
يحيى : نقدر نتفرج معاك ا زين ؟
انا : مسينا على الله 
يحيى : عالية ماغاتسمحيس ليا ؟ 
انا : لا ابدا غير نسا و دابا سكتنا خليني نتفرج

  الجزء 29

يحيى : اوكي ، ايييييي قلبي غادي نموت 
انا نضت مخلوعة كانترعد : يحيى ؟ حبيبي ماالك ؟ باش كاتحس لا ماغاتموتش انا سمحت ليك صافي غير نوض ماتخلينيش عافاك 
يحيى جرني عندو تا تلاصقت معاه : و بلي نتي خايفة عليا و مسامحاني لاش دافعة كبير ا حبيبة
صرفقتو على حر جهدي تصدم و كلست كانبكي بهيستيرية 
انا : حرام عليك نتا كاتلعب بيا كيف بغيتي اه انا كانبغيك و كانموت عليك و نتا كاتستغل هادشي باش دير فيا مابغيتي واش عارف شحال قاصيت بلي قريت ورقة الطلاق ؟ كنت غانموت و انا ماعارفاش السبب كانتمنى الموت و لا نتفارق معاك بلي عرفت راسي حاملة ماعرفت نبكي ولا نفرح كانحس بطرف منك كايكبر وسط مني و لكن نتا مامعاياش انا عمرني نفكر نتخلى عليك نتى راك الروح ديالي واخا معرت اش يطرى عمرني نخليك و غانبقا نبغيك ديما
جرني لعنندو عنقني و حط راسي على صدرو
يحيى : صافي تهدني كلشي فات دابا ، عالية سمحي ليا انا ا للالة حمار و مكلخ و ماكانعرفش نفكر و برهوش و ماعندي عقل و كانبغيك
انا : ههه حتى انا كانحماق عليك 
دوزنا ليلة رومنسية بكل المقاييس عوضنا فيها هاد المدة كاملة واخا بوقالتي برزطاتنا ههه 
فقت الصباح لقيت يحيى كايشوف فيا و يفرنس بوحدو
يحيى : ههه عالية بلتي ف حويجك
انا : لهلا يحيك اويلي اش هادشي لا مايمكنش باقي الحال على الولادة 
يحيى : غاتولدي ؟
انا : اااااااااااااااااي وا ميييييييييييي غانمووووووووت ا عيباد الله عتقو الرووووووح 
يحيى تلف ولا يدخل و يخرج فالهدرة 
يحيى : بلاتي انا غانديك لا صبري ا حبيبة باش كاتحسي
انا : وا عتقنييييييييي ا وجه النحس راه كانموووووووت
هزني يحيى فالطوموبيل داني للكلينيك كسرت الدنيا بالغوات حسيت بواحد الوجع خطيييير الله يسمح لينا من الواليدين و صافي
ولدت عادية دازت الولادة على خير

 الجزء اﻷخير

رجعت للدار انا و حبيبي و بنتي نور باها لي ختار ليها هاد السمية حيت نورات لينا حياتنا
انا : علاش هاد الخسران كامل ا يحيى غير كاضيع فالفلوس هاكاك
يحيى : ماشي سوقك هادا سبوع بنتي الغزالة خليني نفرح بيها مال الدنيا مايسوا والو قدامها
انا : هه دبر راسك ا سيدي حيد خليني نوض
يحيى : لا راك باقا عيانة رتاحي ليا مع راسك باش تبراي دغيا راني توحشتك
انا : هههه لا غانتعطل شوية ا حبيبي النفاس غايدي لينا واحد 40 يوم
يحيى حل فمو : لا ماتقوليهاش شنو زعمة انا نضيع دابا
انا : هههه اش بغيتيني ندير ليك هادشي بسباب بنتك نور
يحيى : اففف نصبر اللالة نصبر عليك
داز السبوع وااااعر بالدقيقية و الجوق يحيى فرحان دبح جوج حوالة كبار
داز السبوع مزيان و رجعت انا و حبيبي لحياتنا لي تزادت فيها الغزالة ديالنا نور مسكين يحيى ديما كايفيق معايا فالليل بلي كانوض ن رضعها و عمرو ما تعامل معايا خايب بلعكس كانت حياتنا حلوة ضروري من شوية المشاكل بحال كاع الناس و لكن على وجه الحب كلشي يهون
ماغاديش نقول هادي النهاية ، حيت هادي يالاه البداية ..

    اضف تعليقاً عبر:

  • blogger
  • disqus

الابتسامات

0102030405060708091011121314151617181920212223242526272829303132333435363738394041424344

design by : bloggerinarab, powered by : blogger
كافة الحقوق محفوظة لمدونة قصص مغربية✪ 2014 - 2016